Yatra 2026 देऊरला यात्रेनिमित्त चेअरमन चषक कब्बडी स्पर्धा, बाणेर पुणे ठरले विजेते, वाघेश्वर चरोली उपविजेता!

देऊरमध्ये रंगला कबड्डीचा थरार! ‘मॅट’वर गाजल्या राज्यभरातील नामांकित संघाच्या चढाई!

प्रकाश राजे/ महाराष्ट्र वन न्यूज -धार्मिक आणि क्रीडा संस्कृतीचा संगम असलेल्या श्री क्षेत्र देऊरमध्ये रंगलेल्या भव्य राज्यस्तरीय ‘मॅट’ कबड्डी स्पर्धेत बाणेर पुणे क्रीडा मंडळ संघाने बाजी मारली आहे. अंतिम सामन्यात त्यांनी वाघेश्वर क्रीडा मंडळ चरोलीचा 6 गुणांनी पराभव करत विजेतेपदावर नाव कोरले. वाघेश्वर चरोली उपविजेता ठरला, तर कासेगाव (सांगली) आणि यजमान मुधाई कबड्डी संघ अनुक्रमे तिसऱ्या आणि चौथ्या क्रमांकावर राहिले. Yatra 2026

भैरवनाथ – जोगेश्वरी यात्रेनिमित्त रंगला थरार:

महाराष्ट्र राज्य आणि जिल्हा कबड्डी असोसिएशनच्या मान्यतेने श्री मुधाई देवी कबड्डी संघ आणि युवा नेते धनसिंग सदाशिव कदम यांच्या मार्गदर्शनाखाली देऊर ग्रामपंचायत चौकात ही भव्य स्पर्धा पार पडली. राज्यातील 12 नामांकित संघानी या स्पर्धेत सहभाग घेऊन क्रीडाप्रेमींना कबड्डीचा रोमांच अनुभवला. मॅटवर रंगलेल्या या सामन्यांमध्ये खेळाडूंनी कौशल्य आणि जिद्दीचे प्रदर्शन केले.

रोमांचक अंतिम सामना:

अंतिम सामन्यात बाणेर पुणे आणि वाघेश्वर चरोली यांच्यात अटीतटीची लढत पाहायला मिळाली. दोन्ही संघानी जबरदस्त खेळ केला. मात्र, बाणेर संघाने शेवटच्या क्षणी आपला संयम राखून 6 गुणांनी विजय मिळवला आणि विजेतेपदावर शिक्कामोर्तब केले.

पारितोषिक वितरण:

विजेत्या आणि उपविजेत्या संघांना रोख रक्कम आणि आकर्षक चषक देऊन गौरवण्यात आले. प्रथम क्रमांकासाठी 21 हजार 56 रुपये, द्वितीय क्रमांकासाठी 15 हजार 56 रुपये, तृतीय क्रमांकासाठी 11 हजार 56 रुपये आणि चौथ्या क्रमांकासाठी 7 हजार 56 रुपये रोख रक्कम देण्यात आली.

क्रीडा संस्कृती जोपासण्याचा निर्धार:

यावेळी आयोजक धनसिंग कदम म्हणाले, “देऊर हे धार्मिक क्षेत्र आहेच, सोबतच क्रीडा नगरी म्हणूनही याची ओळख आहे. या स्पर्धेच्या माध्यमातून ग्रामीण भागातील क्रीडा संस्कृती जोपासण्याचा आणि तरुण खेळाडूंना प्रोत्साहन देण्याचा आमचा प्रयत्न आहे.”

पंच आणि मान्यवर:

स्पर्धेचे पंच म्हणून प्राध्यापक तानाजी साबळे, प्राध्यापक टी एम कदम, प्राध्यापक मनेश धुमाळ, प्रा.संदीप चव्हाण यांनी काम पाहिले. युवा नेते प्रदीप कदम आणि अजित कदम यांनी सूत्रसंचालन केले. बक्षीस वितरण प्रसंगी ग्रामपंचायत सदस्य विकास कदम, सह्याद्री सहकारी बँकेचे माजी संचालक दिलीप कदम आणि अनेक ग्रामस्थ उपस्थित होते.