Voter List Revision SIR 2026: निवडणूक आयोगाचा मोठा निर्णय! मतदार यादी सखोल पुनरीक्षण मोहिमेला १७ ऑगस्टपर्यंत मुदतवाढ; बीएलओ (BLO) येणार तुमच्या घरी
मुंबई | महाराष्ट्र वन न्यूज वृत्तसंस्था
महाराष्ट्र शासनाच्या माहिती व जनसंपर्क महासंचालनालयाने आणि निवडणूक आयोगाने राज्यभरात सुरू असलेल्या विशेष सखोल पुनरीक्षण Voter List Revision SIR 2026 मोहिमेबाबत अत्यंत महत्त्वाचा निर्णय घेतला आहे. मतदार याद्यांच्या पारदर्शकतेसाठी आणि अचूकतेसाठी राबवल्या जाणाऱ्या या मोहिमेअंतर्गत, मतदान केंद्रस्तरीय अधिकारी (BLO) यांच्या घरोघरी जाण्याच्या गृहभेटींच्या मुदतीला आता १७ ऑगस्ट २०२६ पर्यंत मुदतवाढ देण्यात आली आहे. नागरिकांनी अनावधानाने मतदार यादीतून नाव वगळले जाऊ नये म्हणून आपल्या क्षेत्रातील बीएलओ अधिकाऱ्यांना योग्य ती माहिती देऊन पूर्ण सहकार्य करण्याचे आवाहन प्रशासनाकडून करण्यात आले आहे.
शासनाने का सुरू केली ‘SIR’ मोहीम?
देशात यापूर्वी २००२ ते २००४ दरम्यान म्हणजे तब्बल २२ वर्षांपूर्वी शेवटची सखोल पुनरीक्षण मोहीम राबवण्यात आली होती. त्यानंतरच्या काळात मोठ्या प्रमाणावर झालेले नागरीकरण आणि स्थलांतर यामुळे एकाच व्यक्तीची नावे दोन वेगवेगळ्या ठिकाणी असणे, मृत व्यक्तींची नावे यादीत राहणे किंवा पत्ता बदलल्यामुळे मतदारांना येणाऱ्या अडचणी वाढल्या होत्या. या पार्श्वभूमीवर मतदार यादीतील सर्व चुका मुळापासून दुरुस्त करून एक अचूक, पारदर्शक आणि बोगसमुक्त मतदार यादी तयार करण्यासाठी शासनाने ही विशेष Voter List Revision SIR 2026 मोहीम हाती घेतली आहे.
योग्य माहितीसह फॉर्म भरणे का गरजेचे आहे?
बीएलओ घरोघरी आल्यावर अथवा ऑनलाइन पोर्टलवर माहिती सबमिट करताना अर्ज अचूक भरणे अत्यंत आवश्यक आहे. योग्य माहिती दिल्यास मतदार यादीतून नाव अनावधानाने कमी होत नाही, तसेच नाव, वय, लिंग किंवा स्पेलिंगमधील चुका दुरुस्त होऊन नवीन डिजिटल अथवा स्मार्ट व्होटर कार्ड मिळवणे सोपे जाते. याशिवाय अचूक पत्त्यामुळे राहत्या घराच्या जवळचे मतदान केंद्र मिळते, दुबार नोंदणी रद्द होते आणि चुकीची माहिती दिल्यास होणाऱ्या कायदेशीर अडचणी व दंडात्मक कारवाईपासून बचाव होतो.
नागरिकांनी ‘या’ ५ गोष्टींची नोंद घ्यावी
या प्रक्रियेत नागरिकांना सहकार्य करण्यासाठी निवडणूक आयोगाने विविध सुविधा उपलब्ध करून दिल्या आहेत. आपले नाव यादीत तपासण्यासाठी नागरिक voters.eci.gov.in या अधिकृत वेबसाईटला भेट देऊ शकतात किंवा मोबाईलवर ‘ECINET’ अॅप वापरू शकतात. जर मागील मतदार यादीत नाव आढळले नसेल, तर संबंधित अर्जाचा ‘भाग २’ अचूक भरून देणे गरजेचे आहे. अधिक माहिती अथवा तक्रारीसाठी १९५० या मोफत हेल्पलाइन क्रमांकावर संपर्क साधता येईल किंवा जवळच्या इआरओ (ERO) कार्यालयाला भेट देऊन शंकांचे निरसन करता येईल.
