खासगी हॉस्पिटल्ससह काळ्या धंदेवाल्यांचे धाबे दणाणले
सातारा / मुंबई:
आपल्या कडक आणि धडक कार्यपद्धतीमुळे संपूर्ण महाराष्ट्राचे लक्ष वेधून घेणारे सनदी अधिकारी तुकाराम मुंढे Tukaram Mundhe यांनी अन्न व औषध प्रशासन (FDA) विभागाचा पदभार स्वीकारताच काळ्या धंदेवाल्यांवर थेट ‘सर्जिकल स्ट्राईक’ सुरू केला आहे. आयुक्तपदाची सूत्रे हाती घेतल्यानंतर अवघ्या महिनाभरात मुंढेंनी घेतलेल्या आक्रमक निर्णयांमुळे गुटखा माफिया, दूध भेसळखोर आणि खासगी रुग्णालयांची मनमानी करणाऱ्यांचे धाबे दणाणले आहेत.
विशेष म्हणजे, तुकाराम मुंढेंच्या या धडक कारवाईचे राज्याचे अन्न व नागरी पुरवठा मंत्री छगन भुजबळ यांनी जाहीर स्वागत केले असून, “लोकांचा जीव घेणाऱ्या भेसळखोरांना अवश्य ‘मकोका’ (MCOCA) लावा!” अशी उघड आणि तगडी साथ भुजबळांनी दिली आहे.
“दुधात केमिकल टाकणाऱ्यांवर कडक तुटून पडा!” – मंत्री छगन भुजबळ
सातारा येथे प्रसारमाध्यमांशी बोलताना मंत्री छगन भुजबळ Chagan Bhujbal यांनी तुकाराम मुंढेंच्या कामाचे तोंडभरून कौतुक केले. भुजबळ म्हणाले की, “अन्नधान्य, दूध आणि दैनंदिन खाण्याच्या पदार्थांमध्ये सध्या सर्रास आणि मोठ्या प्रमाणावर भेसळ होत आहे, ही अत्यंत गंभीर बाब आहे. दुधामध्ये कसले कसले जीवघेणे केमिकल्स आणि पावडरी टाकल्या जातात, ज्यामुळे लहान मुलांपासून वृद्धांपर्यंत सर्वांच्याच किडन्या निकामी होत आहेत. या भेसळीमुळे लोकांचे आरोग्य आणि संपूर्ण भविष्यच उद्ध्वस्त होत आहे. मी स्वतः फोन करून तुकाराम मुंढेंना स्पष्ट सांगितले आहे की, दुधातील आणि अन्नातील भेसळखोरांवर जेवढी कडक आणि कठोर कारवाई करता येईल, तेवढी करा!”
अन्नधान्य, दूध आणि औषधांसारख्या अत्यंत संवेदनशील गोष्टींमध्ये खोट्या आणि मानवनिर्मित पद्धतीने भेसळ करून लोकांच्या जिवाशी खेळणाऱ्या गुन्हेगारांना वठणीवर आणण्यासाठी थेट महाराष्ट्र संघटित गुन्हेगारी नियंत्रण कायदा म्हणजेच ‘मकोका’ (MCOCA) लावणे अत्यंत गरजेचे आहे आणि एफडीएने ही कारवाई अवश्य करावी, असा कडक आणि आक्रमक पवित्रा छगन भुजबळ यांनी घेतला आहे.
गुटखा आणि तंबाखू विक्रीवर ‘मकोका’चा बडगा
अन्न व औषध प्रशासन विभागाचे आयुक्तपद स्वीकारल्यापासून गेल्या महिनाभरात केलेल्या धडक कारवायांची माहिती तुकाराम मुंढेंनी पत्रकार परिषदेत दिली. राज्यात गुटखा आणि तंबाखूजन्य पदार्थांवर बंदी असतानाही छुप्या मार्गाने चालणाऱ्या या काळ्या बाजारावर मुंढेंनी थेट प्रहार केला आहे. गुटखा आणि प्रतिबंधित तंबाखूजन्य पदार्थांचे उत्पादन करणारे कारखाने, राज्यामध्ये पुरवठा करणारे मोठे वितरक (Suppliers), स्थानिक विक्रेते आणि अगदी गुटखा खरेदी करणाऱ्या ग्राहकांवरही आता संघटित गुन्हेगारी अंतर्गत ‘मकोका’ लावला जाणार आहे. यामुळे गुटखा माफियांचे धाबे दणाणले आहेत. साखळीच उद्ध्वस्त करण्यासाठी यापुढे गुटखा पकडल्यानंतर केवळ साधी दंडात्मक कारवाई किंवा जप्ती करून एफडीए थांबणार नाही.
हॉटेल व्यावसायिक, गुटखा माफिया आणि दूध भेसळखोरांना वठणीवर आणल्यानंतर तुकाराम मुंढेंनी आपला मोर्चा खासगी रुग्णालयांकडे वळवला आहे.
रुग्णांचा हक्क अबाधित: रुग्णालयात दाखल रुग्णांच्या नातेवाइकांना ‘आमच्याच अंतर्गत फार्मसीमधून औषधे घ्या’, अशी सक्ती करणाऱ्या रुग्णालयांना मुंढेंनी थेट दणका दिला आहे.
कायदेशीर आदेश: रुग्णालयातील मेडिकलमधूनच औषधे खरेदी करणे कायद्याने अजिबात बंधनकारक नाही. औषधे कुठून आणि कोणत्या दरात खरेदी करायची, हा सर्वस्वी रुग्ण आणि त्यांच्या नातेवाइकांचा अधिकार आहे, असा अधिकृत शासकीय आदेश त्यांनी जारी केला आहे.
या आदेशाचे उल्लंघन करून नातेवाइकांवर दबाव टाकणाऱ्या कोणत्याही रुग्णालयावर थेट कायदेशीर गुन्हा दाखल करून कडक कारवाई केली जाईल, असा कडक इशारा मुंढेंनी दिला आहे.
आयुक्त तुकाराम मुंढेच्या या निर्णयाचे जनतेतून स्वागत होत आहे. यामुळे मनमानी करणाऱ्या हॉस्पिटल सोबत दूध भेसळ व अवैध गुटखा विक्री करणारांचे धाबे दणाणले आहेत.
Tukaram Mundhe FDA Action MCOCA Maharashtra, Chhagan Bhujbal Support Tukaram Mundhe Milk Adulteration, Private Hospital Pharmacy Sakti Rules FDA, Maharashtra Food and Drug Administration MCOCA Gutkha, Tukaram Mundhe Orders Hospital Medicine Prescription,
