Sant Dnyaneshwar Maharaj Palkhi 2026: लोणंदमध्ये वारीदरम्यान माणुसकीचे दर्शन! कारखाली लपलेल्या नग्न मनोरुग्णाला पोलीस अन् नागरिकांनी दिले जीवदान!
गणेश भंडलकर / लोणंद:
Sant Dnyaneshwar Maharaj Palkhi 2026: श्री संत ज्ञानेश्वर महाराज (माऊली) यांच्या पालखी सोहळ्याचे लोणंद नगरीत स्वागत होत असतानाच, येथे माणुसकी आणि संवेदनशीलतेचे एक अत्यंत कडक उदाहरण समोर आले आहे. लोणंद बसस्थानक परिसरातील गजबजलेल्या गर्दीत एक मनोरुग्ण व्यक्ती नग्न अवस्थेत एका उभ्या कारच्या खाली जाऊन बराच वेळ लपून बसल्याने परिसरात एकच खळबळ उडाली होती. त्या व्यक्तीच्या जीवितास कोणताही धोका निर्माण होऊ नये आणि पालखी सोहळ्याच्या पवित्र वातावरणात कोणताही अनुचित प्रकार घडू नये, यासाठी स्थानिक नागरिक, पोलीस प्रशासन आणि महसूल यंत्रणेने तातडीने धाव घेत दाखवलेली तत्परता सध्या कौतुकाचा विषय ठरत आहे.
या गंभीर घटनेची माहिती मिळताच लोणंद शिवसेना पदाधिकारी गणेश दणाणे आणि जमीर शेख यांनी क्षणाचाही विलंब न लावता लोणंद पोलीस स्टेशन तसेच १०८ रुग्णवाहिका सेवेशी संपर्क साधला. माहिती मिळताच पोलीस आणि आरोग्य प्रशासन अवघ्या काही मिनिटांत घटनास्थळी दाखल झाले. कारखाली अत्यंत अडचणीच्या जागेत अडकलेल्या त्या मनोरुग्णाला पोलिसांनी आणि नागरिकांनी अत्यंत संयमाने आणि काळजीपूर्वक सुखरूपपणे बाहेर काढले. त्यानंतर प्राथमिक आरोग्य केंद्राच्या वैद्यकीय पथकाने त्याची जागेवरच तपासणी केली आणि पुढील उपचारासाठी त्याला १०८ रुग्णवाहिकेतून सातारा येथील शासकीय रुग्णालयात दाखल करण्यात आले. वेळेवर मिळालेल्या या मदतीमुळे एका जिवाचा संभाव्य अनर्थ टळला आहे.
या संवेदनशील मोहिमेत खंडाळ्याचे तहसीलदार सुहास थोरात यांनी स्वतः घटनास्थळी हजर राहून परिस्थिती हाताळली आणि आवश्यक सूचना दिल्या. लोणंद पोलीस स्टेशनचे पोलीस उपनिरीक्षक कृष्णांत निंबाळकर, वाहतूक शाखेचे अतुल कुंभार, पोलीस कर्मचारी रामचंद्र तांबे, आर. बी. सोनवलकर, महेश टेकवडे यांनी नागरिकांच्या मदतीने गर्दी नियंत्रणात ठेवत त्या व्यक्तीची सुरक्षित सुटका केली. या मदतकार्यात गणेश पवार, गणेश दणाणे, जमीर शेख, दादा रणदिवे आणि नयनाताई मेमाणे (लोणंदकर) यांच्यासह प्राथमिक आरोग्य केंद्राच्या कर्मचाऱ्यांनी दाखवलेली तत्परता खरोखरच कौतुकास्पद ठरली. माऊलींच्या वारीत लाखो भाविक दाखल होत असताना घडलेल्या या घटनेने संकटाच्या प्रसंगी माणुसकी अजूनही जिवंत असल्याचे पुन्हा एकदा सिद्ध केले आहे.
