FIFA WORLD CUP 2026 एकाच दिवशी ४ सुपरस्टार्सचा महाधमाका! मेसी, रोनाल्डो, एम्बापे अन् हालँडने रचला नवा इतिहास; भन्नाट सेलिब्रेशनने मैदान गाजवले
वॉशिंग्टन/ स्पोर्ट डेस्क/ महाराष्ट्र वन
फिफा वर्ल्ड कप २०२६ (FIFA World Cup 2026) मध्ये काल रात्री फुटबॉल जगताने एक अभूतपूर्व आणि ऐतिहासिक ‘सुपर-बिग डे ‘ अनुभवला असून जगातील चार सर्वात मोठ्या सुपरस्टार्सनी एकाच दिवशी आपापल्या संघांसाठी प्रत्येकी दोन गोल (Brace) झळकावून नवा इतिहास रचला आहे. मेसी, रोनाल्डो, एम्बापे अन् हालँडने यांनी या दिवशी प्रत्येकी दोन गोल करीत वर्ल्ड कपचा सुपर बिग डे साजरा केला. जुन्या व अनुभवी खेळाडूंची अशी कामगिरी फुटबॉल प्रेमींनी पहिल्यांदाच अनुभवली.
अर्जेंटिना विरुद्ध ऑस्ट्रिया यांच्यात झालेल्या चुरशीच्या सामन्यात दिग्गज लिओनेल मेसीने (Lionel Messi) डी-बॉक्सच्या बाहेरून आपल्या जादुई डाव्या पायाने फ्री-किक मारत पहिला गोल केला आणि त्यानंतर पेनल्टीवर दुसरा गोल पूर्ण केला. या दोन गोलसह मेसीने वर्ल्ड कपच्या इतिहासात सर्वाधिक १८ गोल करण्याचा विश्वविक्रम आपल्या नावावर केला असून गोल केल्यानंतर त्याने नेहमीप्रमाणे दोन्ही हातांची बोटे आकाशाकडे दाखवत आणि जर्सी हवेत उंचावून भन्नाट सेलिब्रेशन केले.
मेसीच्या या वादळाला फ्रान्सच्या किलियन एम्बापेने (Kylian Mbappé) इराक विरुद्धच्या सामन्यात सडेतोड उत्तर दिले. आपल्या १०० व्या आंतरराष्ट्रीय सामन्यात खेळणाऱ्या एम्बापेने अफाट वेगाच्या जोरावर इराकी डिफेंडर्सना चकवून पहिला आणि त्यानंतर हवेतल्या हवेत ‘व्हॉली’ मारून दुसरा गोल डागला, ज्यानंतर त्याने त्याचे प्रसिद्ध सिग्नेचर सेलिब्रेशन करत दोन्ही हात छातीवर दुमडून गुडघ्यांवर सरकत मैदानावर झेप घेतली.
या दोन दिग्गजांच्या बरोबरीने नॉरवेच्या अर्लिंग हालँडने (Erling Haaland) सेनेगल विरुद्धच्या सामन्यात आपल्या शारीरिक ताकदीचे प्रदर्शन करत उत्तरार्धात अवघ्या १५ मिनिटांत दोन गोल केले, ज्यात एक कडक हेडर आणि दुसरा वेगवान शॉट सामील होता आणि गोल झाल्यानंतर त्याने मैदानावर शांतपणे मांडी घालून बसत ‘योग’ (Yoga Meditation) करण्याचे त्याचे प्रसिद्ध सेलिब्रेशन केले.
याच काळात पोर्तुगालचा महान खेळाडू ख्रिस्तियानो रोनाल्डोनेही (Cristiano Ronaldo) उझबेकिस्तान विरुद्ध सुरुवातीला मिळालेल्या पेनल्टीवर आणि नंतर ६५व्या मिनिटाला हवेत तरंगत अप्रतिम हेडर मारून दोन गोल झळकावले. या कामगिरीसह रोनाल्डो जगातील सहा वेगवेगळ्या वर्ल्ड कप आवृत्त्यांमध्ये गोल करणारा पहिला एकमेव खेळाडू ठरला असून त्याने कॉर्नर फ्लॅगकडे धावत जाऊन हवेत उंच उडी मारत त्याचे जगप्रसिद्ध ‘SIUUU’ सेलिब्रेशन केले, ज्यामुळे संपूर्ण स्टेडियम ‘सियूयूयू’च्या आवाजाने दुमदुमून गेले.
फुटबॉलच्या इतिहासात एकाच दिवशी किंवा एकाच काळात या चार महानायकांनी प्रत्येकी २-२ गोल करून आपापल्या चाहत्यांना सेलिब्रेशनची सर्वात मोठी पर्वणी दिली असून सध्या सोशल मीडियावर याच महासंग्रामाची चर्चा रंगली आहे.
